EXPO Henri Marin Gardanne 2017

Marius Deleuil lou14 d’abriéu 2017

ÓUMAGE À N’ ENRI MARIN
Pèr rendre óumage à n’Enri Marin, vau lou faire en prouvènçau, perqué
Enri ère un prouvènçau de souco, un prouvènçau de la bono, un
prouvènçau embuga, impregna de Prouvènço !
Tóuto sa vido l’a coursejado, barulado d’en pertout sa Prouvènço ‘mé soun
cavalet e sis pincéu ! en proumié dins lou relarg de Gardano, Simiano,
Mimet, Santo Victori, la cadeno de l’Estèlo, Barbantano / Bedarido, Sant-
Vincent dins leî Aup,..e en oublidi seguramèn !...a vougu,’mé soun art soun
amour pinta tóutis aquelis ‘’aquarelles’’ perqué pousquèssoun resta
impregnado dins sa memòri e subretout de n’en faire profita leï autre.
Tout ço que poudié revalorisa Prouvènço, Enri lou fasié : a pres la
presidènci de Parlaren Gardano à la debuto deïs annado 80 enjusqu’en
2002 à pèr aqui..
Poudèn pas oublida tóuti leï cours de prouvènçau qu’a douna tant au sèti de
Parlaren Gardano que dins leï escolo,… E lou tiatre n’en voulès de pèço de
tiatre ? n’en vaqui : l’oumeleto de Muret, l’as paga lou capéu, l’analiso,…
Enri s’accountavo pas de resta à Gardano s’ouvènti-fes partié faire d’espousicien e debourdavo un pau à Simiano, Barbantano / Bedarido etc…
Fau pas oublida nimai soun emplicacien dins leï tambourinaire mai que d’un cop a douna deï cours de soulfege e de musico ; es pas Pierre Eyguesier que me countradira, qu’es esta l’escoulan d’Enri.
Mai que d’un cop sian ana rendre visito à n’Enri au trémond de sa vido coure ère à l’oustau de retraite de Simiano, sieguesse ‘mé Daniso Lallemand sieguesse ‘mé Josi Massot : nous disié, Enri, que de vespre après lou soupa, èro ‘mé Frederi Mistral, recitavo leï cant de Mirèio, ou alor èro ‘m’Aubanel !
É leï tradicien ! Subretout aquèli de Nouvè ; d’en proumié ère la messo de miejo-nue, lou group deî tambourinaire pèr accounpagna leï cant de Nouvè.
Fau qu’aguessian tambèn uno pensado pèr Marie-Thé, sa fremo, que lou jour de Nouvè lou segoundavo bèn pèr leï tradicien : Lou repas de Nouvè acó ère sacra, e la grando taulo pèr recampa tóuto sa grando famiho, leï caganis, lou cacho-fiò, etc…
Enri s’es anana d’aise d’aise em’un èr de tambourin en testo !
Enri, nous a traça un camin,… Sian uno moulounado à lou segui !...
Gramaci Enri Marin.