1- O Magali ma tant amado
Mete la tèsto au fenestroun !
Escouto un pau aquesto aubado
De tambourin e de vióuloun.

- Es plen d'estello, aperamount!
L'auro es toumbado,
Mai lis estello paliran,
Quand te veiran!

2- Pas mai que dóu murmur di broundo,
De toun aubado iéu fau cas!
Mai iéu m'en vau dins la mar bloundo
Me faire anguielo de roucas.

- O Magali! se tu te fas
Lou pèis de l'oundo,
Iéu, lou pescaire me farai, 
Te pescarai!

3- Oh! mai, se tu te fas pescaire,
Ti vertoulet quand jitaras,
Iéu me farai l'aucèu voulaire,
M'envoularai dins li campas.

- O Magali, se tu te fas
L'aucèu de l'aire,
Iéu lou cassaire me farai,
Te cassarai.

4- I perdigau, i bouscarido
Se vènes, tu, cala ti las,
Iéu me farai l'erbo flourido
E m'escoundrai dins li pradas

- O Magali, se tu te fas
La margarido, 
Iéu l'aigo lindo me farai
T'arrousarai.

5- Se tu te fas l'eigueto lindo
Iéu me farai lou nivoulas
E lèu m'enanarai ansindo
A l'Americo, perabas!

- O Magali, se tu t'envas
Alin in Indo,
L'auro de mar iéu me farai,
Te pourtarai!

6- Se tu te fas la marinado,
Iéu fugirai d'un autre las: 
Iéu me farai l'escandihado
Dóu grand soulèu que found lou glas!

- O Magali, se tu te fas
La souleiado,
Lou verd limbert iéu me farai,
E te béurai !

7- Se tu te rèndes l'alabreno
Que se rescound dins lou bartas,
Iéu me rendrai la luno pleno
Que dins la niue fai lume i masc!

- O Magali, se tu te fas
Luno sereno,
Iéu bello nèblo me farai,
T'acatarai.

8- Mai se la nèblo m'enmantello
Tu, pèr acò, noun me tendras ; 
Iéu, bello roso vierginello,
M'espandirai dins l'espinas! 

- O Magali, se tu te fas
La roso bello,
Lou parpaioun iéu me farai,
Te beisarai.

9- Vai, calignaire, courre, courre!
Jamai, jamai m'agantaras.
Iéu, de la rusco d'un grand roure
Me vestirai dins lou bouscas.

- O Magali, se tu te fas
L'aubre di moure,
Iéu lou clot d'èurre me farai 
T'embrassarai!

10- Se me vos prene à la brasseto,
Rèn qu'un vièi chaine arraparas...
Iéu me farai blanco moungeto
Dóu mounastié dóu grans Sant Blas!

- O Magali, se tu te fas
Mounjo blanqueto,
Iéu, capelan, counfessarai,
E t'ausirai!

11- Se dóu couvènt passes li porto,
Tóuti li mounjo trouvaras
Qu'à moun entour saran pèr orto,
Car en susàri me veiras!

- O Magali, se tu te fas
La pauro morto,
Adounc la terro me farai
Aqui t'aurai!

12- Aro coumence enfin de crèire
Que noun me parles en risènt :
Vaqui moun aneloun de vèire
Pèr souvenènço, o bèu jouvènt!

- O Magali me fas de bèn! ...
Mai, tre te veire,
Ve lis estello, o Magali, 
Coume an pali!

1- "O Magali, ma tant aimée,
Mets la tête à la fenêtre !
Écoute un peu cette aubade
De tambourins et de violons.

- (Le ciel) est là-haut plein d'étoiles,
Le vent est tombé ;
Mais les étoiles pâliront
En te voyant.

2- Pas plus que du murmure des branches, 
De ton aubade je fais cas ! 
Mais je m'en vais dans la mer blonde 
Me faire anguille de rocher. ..........

https://www.mamalisa.com/?t=fs&p=4178