20. avr., 2020

LOU PORTO-AIGO DE LA « TRACONNADE » A JOUCO pèr Mirèio

LOU PORTO-AIGO DE LA « TRACONNADE » A JOUCO

 « De JOUCO à MEIRARGO »

Pèr li journado dóu patrimòni, dissate lou 15 de setèmbre de 2018, avèn chausi d’ana descurbi li vestige dóu porto-aigo rouman de la « Traconnade »,  basti au siècle segound pèr adurre l'aigo à-z-Ais despièi Jouco, Peirolo, Meirargo, Venello e sus uno distànci de trento-un km. A l’epoco, cinq-milo ome an travaia pendènt cinq an. Aquesto journado èro pourgido pèr l'assouciacioun « lis ami de Jouco ».

Avian rendès-vous à Peirolo à 9 ouro dóu matin preciso pèr èstre mena à Jouco em'un car. Erian quinge   e sian esta aculi pèr dous bountous,  Bernat e Marc. Pèr la vesito, avèn fourma dos chourmo.

Devian agué caussaduro de marcho, capèu, aigo e lume. Avèn leissa lou rejauchoun dins la veituro. Devian se recampa à nòsti veituro, vers miejour,  pèr ana  dina, tóutis ensèn, dins la salo di fèsto de Meirargo.

D’en proumié, Bernat a mena nosto chourmo proche dóu sourgènt de la Tracounado ounte avèn vist la debuto dóu canau sus la ribo d’uno pichoto routo. Vous fau dire que pèr vèire aquest óuvede, fau lou saupre,  perqué i’a ges d’entre-signe !  I’a quàuquis annado, se poudié vanega à l’interiour emé un lume mai aro es enebi. 

Avèn camina  vers un ensèmble de nouvèus oustau ounte avèn vist quàuqui pèiro taiado, soubro dóu porto-aigo, mai la majo-part an despareigu emé la coustrucioun dis oustau.  Avèn quita lis oustau e escala dins la colo. Aqui Bernat nous a moustra  de partido d'óuvede bèn counservado, de « regard » que pareissien èstre de pous (em'aquéli « regard », li bastissèire poudien vesita e  countourroula  lou bon estat dóu porto-aigo), de pont.

Noste guide estènt un afouga dóu porto-aigo, voulié rèn  óublida, adounc sian arriba i veituro  forço tard , èro quàsi dos ouro de l’après-dina, avian lou ruscle !

 Avèn dina à Meirargo emé Bernat e Marc que nous an fa gousta de l’aigo fresco dóu sourgènt de la Tracounado (èro uno guignado)  e óufert  lou cafè.

Après aquest dina forço agradiéu, un « diaporama »  es esta proujeta  pèr nous moustra lou plan dóu  porto-aigo enjusqu’ à-z-Ais.

 L’après-dina, Bernat e Marc nous an mena vers  « le pas de l’étroit ». Es un endré ounte i’a encaro 3  arco  d’un pont aeren  que traversavo  la colo. Mai luen, avèn marcha à l’interiour d’un óuvede sus 80 m e 1,50 m d’aut en forço bon estat. Quand se pènso qu’aquest óuvede es esta auboura i’a 2000 an !

  Nòstis ami an coumta mai de 200 vestige, mai de 2 km de moussèu de galarié, un óuvede de 8,4 km, soulet en Gaulo,  souto lou planestèu de Venello.

Nosto journado s’es acabado à Meirargo, au pont de la ribiero que se dis « le grand vallat ». Se pòu vèire li dous grand pieloun dóu pont rouman de chasque coustat dóu valat.

Se sian dessepara à 5 ouro de l’après-dina après agué camina quàsi 15 km.

 Ai apres que Bernat e Marc soun dous arqueoulogue bountous qu’an fa uno counferènci lou 18 d’óutobre de 2018 à-z-Ais sus lou porto-aigo, counferènci prepausado pèr lis « Amis de la Méjanes".

Mirèio C.